омега масти

Омега масти

Дали и каков суплемент од омега масти ти треба

Пред некој ден добив инспирација да позборувам повеќе за омега масти и за нивната важност и употреба. Инспирацијата беше благодарение на еден разговор со моја драга личност. Имено, разговорот започна со тоа што мој стар и драг пријател од Велес ми кажа дека има покачени триглицериди и ме замоли за помош. Му кажав мое мислење и совет, но во главата ми остана мислата дека многу луѓе на темата регулирање и балансирње на мастите како хранливи вредности се со многу малку практични информации и свест. Најчесто омега користат кога ќе се појави проблем како холестерол, триглицериди или замастен црн дроб.

Прво и основно треба да престанеме да живееме како пожарникари. Треба да престанеме да реагираме единствено ако има пожар или воспаление во телото. Тоа значи снабдување на телото со потребното гориво. Само така ќе може да ги ракува сите метаболички процеси оптимално. Во денешно време се’ повеќе луѓе се свесни за здравјето. Се’ повеќе луѓе се обидуваат да ја балансираат својата исхрана со суплементација. Но, истата таа суплементација ја користат само затоа што на рекламата некој им ветил дека тоа е изворот на здравје. И истата таа суплементација сметаат дека ќе ги испере од сите гревови.

Па така денес многу често среќавани суплементи се “јаки” антиоксиданси или омега 3 која што се правела од “посебен дел” на ајкулата или некое морско животно за кое што ние луѓето имаме стравопочит. Не велам дека сите суплементите се лага или непотребни, но не постои “one size fits all” суплемент.

Затоа во деншнава статија сакам да позборувам малку повеќе конкретно за омега 3 суплементите. Сакам да знаеш што значат, кога ти требаат, колку ти требаат и како да ги препознаваш кој е кој според напишаното на етикетата.

Омега 3

Постојат 3 типа на омега 3 масните киселини. Aлфа-линоленска киселина (ALA), еикозапентаенова киселина (EPA) и докосахексаеинска киселина (DHA). Сите 3 типа на масни киселини нашето тело не може да ги создава и затоа мора да се земаат преку устата. ALA е киселина која што ќе ја сретнеш во масла од растенија како сончогледово, сојно, ленено итн. Имено, оваа масна киселина не е дефицитарна во нашата исхрана за разлика од другиве две. (EPA и DHA) се составен дел од секоја клеточна мембрана во нашето тело. Особено се потребни во повисоки количини во очите, мозокот и сперматозоидите.

ALA масната киселина може да се конвертира во EPA и DHA, но се смета дека од вкупната количина на ALA само 3% до 8% ќе се конвертираат. Затоа, од исклучителна важност е да обезбедиме доволно EPA и DHA. И уште подобар податок е тоа што науката сеуште нема факти со кои докажува дека преголеми количини на овие 2 масни киселини ќе направат некакви несакани последици. Во превод тоа значи дека можеш да јадеш и користиш без кочница и страв.

Омега 6

За разлика од нив, Омега 6 масните киселини се масти кои што се далеку од дефицит. Напротив, постојат научни податоци кои укажуваат дека соодносот на омега 6 : омега 3 е 30 : 1. Ова е голем проблем во денешницата и одличен предуслов за да започнат воспалителни процеси и хронични заболувања. Омега 6 се масти кои што доаѓаат од растенијата и од многуте масла и продукти со вегетални масла што ги користиме секојдневно.

На клетките кај нас цицачите им недостасува ензим омега-3 десатураза и затоа омега-6 масните киселини не можат да се конвертираат во омега-3 масни киселини. Омега-3 и омега-6 масните киселини се всушност конкуренти кои се борат за да го искористат овој ензим (омега-3 десатураза). Ова ја истакнува важноста на пропорцијата на омега-3 со омега-6 масни киселини во нашата исхрана.

Од каде да почнеш со омега масти

Прво нешто каде што можеш да направиш промена е користењето на процесирана храна. Растителните масла како сончогледово и палмино се многу ефтини и затоа кондиторската индустрија ги користи за производство на храна. Па дури и во производите кои што ќе ги најдеш на рафотот за здрава храна. Од таквите манипулатори косата ми се крева! Втора работа е да исфрлиш од употреба сончогледово масло од дома како опција за салата или готвење. Користи маслиново, кокосово или путер.

Кога се работи за користење на суплементи не посегнувај по суплементи кои што имаат во својот состав омега 3 и омега 6 заедно. Веќе донесовме заклучок дека омега 6 внесуваме и повеќе од доволно. Кога сакаш да користиш омега 3 како суплемент гледај во составот позади на етитеката да имаш (EPA и DHA) и тоа најмалку во количини над 200mg. Јас го користам овој. Комбинацијата на добра исхрана и суплемент омега 3 за мене е најдоброто нешто што можеш да го направиш. Користење на морска храна во неделното мени од 2 до 3 пати нека ти стане рутина.

И за крај биди свесен дека добрата исхрана не подразбира да се’ задоволиш со само еден нутриент, туку подразбира баланс и континуитет. Доколку ти треба помош и поддршка за да ги воспоставиш навиките во исхраната дојди на школа за исхрана и среди си ја исхраната засекогаш.

Остави коментар

Your email address will not be published.